Uzbekistan Airways “Humo” xokkey klubining rasmiy homiysi

Oʻzbekistondagi eng yirik aviakompaniyalardan biri boʻlgan Uzbekistan Airways mamlakatimizdagi yagona professional “Humo” xokkey klubining rasmiy hamkori va aviatashuvchisi hisoblanadi.

Uzbekistan Airways 2022/2023 yilgi yubiley mavsumida klub homiysi hamda rasmiy aviatashuvchisiga aylandi va bu yil “Humo” xokkey klubi 5 yoshga to‘ldi. 2022/2023 mavsumida “Humo” Qozog‘iston Pro Hokei Ligasy chempionatida ishtirok etib kelmoqda va hozir turnir jadvalida yetakchi o‘rinlardan birini egallab turibdi.

21-mart kuni “Humo” musobaqaning eng muhim bosqichida Toshkentdagi “Humo Arena”da pley-off yarim finalning beshinchi o‘yinida yana “Beybaris” jamoasiga qarshi bellashadi. Ushbu o‘yin arafasida aviakompaniya xokkey ishqibozlari o‘rtasida tanlov o‘tkazadi. Tanlovda UzAirPlus sadoqatlik dasturining har biri 5 000 balldan iborat 3 ta “PREMIUM” kartalari sovg‘a sifatida g‘oliblarga taqdim etiladi. Tanlov natijalari 20-mart kuni Uzbekistan Airways’ning Instagram’dagi rasmiy sahifasida e’lon qilinadi.

“Hamyurtlarimiz muxlislik qilayotgan jamoani qo‘llab-quvvatlashdan mamnunmiz. Ayniqsa, “Humo” xokkey klubi O‘zbekistonda ushbu sport turini rivojlantirishga katta e’tibor qaratayotgani biz uchun muhimdir”, – dedi “Uzbekistan Airways” AJ Boshqaruv raisi Shuxrat Xudaykulov.